Sonnet nipilersoqatigiiupput Nuummiunik tunngaveqarnerusut 2002-miit 2008-imut nipilersortartuusut inuttaralugillu pingaarnertut Pilu Grønvold, Kristine Thomsen, Mikael Mortensen aamma Anders Berthelsen. Nipilersoqatigiit pilersinneqarput guitarertartumit erinarsuusiortartumillu Pilu Grønvoldimit, tamannalu sioqqullugu erinarsuusiortalersimavoq taamanikkut arnaatini Kristine Thomsen erinarsortoralugu taalliaminik immiussisimalluni. Piffissap taamaalinerani Pilu Grønvold, Nuummi Niuernermik Ilinniarfimmi IT-administratoritut ilinnialersimavoq tassanilu ilinniaqatini aqqutigalugu naapissimavaa Anders Berthelsen, siusinnerusukkut Mechanics In Ini-mi tumerparpaartartuusoq.
Pilu Grønvoldip aamma Kristine Thomsenip immiussaat Anders Berthelsenip tusaramigit nipilesoqatigiiliornissamik isumassarsipput. Anders Berthelsenip siusinnerusukkulli ilisarisimasimavaa Pilu Grønvoldip ilinniaqataa Mikael Mortensen, ataatsimut ilisarisimasatik aqqutigalugit nalunagulu Mikael Mortensen guitarertartuusoq, kisiannili taanna Sonnetikkunnut ilannguppoq bassertartutut.
2005-imi Sonnet unamminermi Nipimi peqataapput. Unammineq ingerlanneqarpoq Godthåb Bryghusimi, ajugaasullu akissarsiassaraat nuussiortitsivimmik Arlantic Musicimik nuussiornissamik isumaqatigiissuteqarnissaq. Unamminermi tassani nipilersoqatigiit tuluttuunik pingasunik atuipput naliliisartunillu marluusunit Danmarkimi nipilersornerup silarsuaaneersunit aggersakkanit aamma Atlantic Musicimiit Ejvind Elsnerimit ajugaasutut toqqarneqarlutik. Taamaalillutik Sonnet nuussualiornissamik Atlantic Musicimik isumaqatigiissusiorput. Tamatuma inerneraa cd ”Unnuaru”, taassumalu imarai atukkat kalaallisuut arfinillit tuluttuullu sisamat. Nuussualiap suliarinerata nalaani Ejvind Elsnerip nipilersoqatigiit kajumissaarpai kalaallisut atukkat arlariit pilersaarutaasunit amerlanerusut immiuteqqullugit, Atlantic Musicimi kalaallisut oqaasertalinnik saqqummiussisarnermik pitsaanerusunik misilittagaqartarsimammat. Taamaakkaluartoq tuluttut atukkat nuussualiameersut marlussuit nuussualiap saqqummersinnerata kingorna radiokkut atorneqarnerpaalerput. Anders Berthelsen aammattaaq musikvideoliorpoq atukkamut ”Tracing the Sun”-imut, taannalu KNR TV-mi uteqattaartumik atorneqartalerpoq.
Nipilersortartut nipilersoriaasertik namminneq imatut taavaat ”Britpop kalaallisut erinarsukkanik akuugaq” aamma AG’p nipilersukkanik nalunaarutiginnittartuata nipilersoqatigit imatut taavai ”Kinguaariit nikinnerisa ilaat”. Taamaattorli nuussualiaq ”Unnuaru” cd-nngorlugu tuusintit missaannik tunisaavoq taamaattumillu niuernikkut torrallataasutut taaneqarsinnaannani.
Ukioq taanna ”Unnuaru” saqqummersinneqarmat Pilu Grønvold Kristine Thomsenilu qimapput naallu tamanna Sonnet ingerlaannartumik atorunnaarnerannik kinguneqanngikkaluartoq nipilersoqatigiit piunerat isaqqajaasutut ilerpoq Kristine Thomsen Ilulissanut nuummat. Sonnet 2008-mi kingulliugallartumik tusarnaartitsipput. 2010-mi nipilersoqatigiit Qaammataasat Pilu Grønvoldip pilersippai 2011-imilu nuussualiaq “Sinnattut” Atlantic Musicikkoorlugu saqqummersinneqarpoq.
Nalunaarsuut:
Kalaallisuunngortitsisuuvoq Erno Aronsen.