Peand-eL


Peand-eL

Peter Lyberth (Peand-eL) Qeqertarsuarmeersuuvoqq. Taamaattorli Kalaallit Nunaanni rappertarnera aallaartippoq ataataniluNarsamut nooreerneratigut. Peand-eL’ip nipilersuusiornissamut soqutiginninnera ukioq 2000 Nord Samsø Efterskolemiinnerani eqeersarneqartutut ippoq taamanikkut atuarfimmi tassani nipilersuutigalugu isiginnaagassiaq “Absurdistan” qulequtaralugu isiginnaaritsissutigineqarmat nipilersuusiornerata ilaani peqataagami. Narsamut uterami Boris Lund illoqarfimmi angerlarsimaffimmini immiussisarfiutilik attaveqarfigaa. Peand-eL’ip oqaluttuarnera malillugu Narsami nipilersunngikkaani allamik susassaaleqinartaqaaq taamaattumillu piffissap ilaa nipilersornermut atortarsimavaat. Taamaattumik Boris Lund peqatigalugu Peand-eL nutaanik nipilersuusiorpoq musicalimilu “Absurdistan”-imi atukkat ilaat ataaseq suliaralugu nangippaat piffissallu ingerlanerani ”Eqqissitinnga”-mik ateqalerluni. 2004-mi Peand-eL aamma Boris Lundip demo-cd 13-inik atugartalik suliaralugu naammassivaat Peand-eL-ilu Nuummut nuuppoq mmiussartik demo Atlantic Musicimut tunniukkiartorlugu. Siullermeersumik immiussaq demo Atlantic Musicimut tunniunnerata kingunitsianngua nuussiortitiviup pisortaa Ejvind Elsner sianerpoq oqarlunilu nipilersukkat saqqummiunnissaat soqutiginartillugu. Kingorna Peand-eL-ip nuussualiassani siulleq immiullugu aallartippaa Nuummi Atlantic Musicip immiussisarfiani Mik S. Christensen nuusiortitsisoralugu. Nuussuualiaq atserneqarpoq ”Eqqissitinnga” 2005-imilu saqqummersinneqarluni. Taanna 18-inik atugartaqarpoq tamarmik kalaallisut taallartaqarlutik. Kalaallit Nunaanni siusinnerusukkut rappertartut allat assigalugit Peand-eL-ip inuuniarnermi ajornartorsiutit taalliamigut saqqummersippai, kisianni sammineqartut aamma allarpassuarnik imaqarput.

Nuussualiaa inunnit tigulluarneqarpoq atugaalu ”Takoqqaarnerit” nuannarisaallualerpoq tassanilu tulleertuuvoq Anda Uldum nipilersoqatigiinnit DDR-kkunneersoq. Peand-eL ukioq taanna Kodamit nersornaaserneqarpoq nuussualiamilu saqqummiunneraniit Kalaallit Nunaanni, Danmarkimi Hollandimilu tusarnaartitsisarsimalluni.

2009-mi Peand-eL’ip nuussuaniliaata tullia ”Tarrara” saqqummerpoq. Taanna aamma rappernermik nuussualiaavoq kalaallisut taallartaqarluni, kisiannili aamma quiasunnitinik arlalinnik ilaqarluni. “Tarrara” 22-nik atugartaqarpoq, tamatumalu saniatigut nipilersortartut nuannerisaasut allat aggersakkat amerlasuut ilaapput. Ataatsimut tamaat isigalugu qatanngutigiit Uldumikkut nuussiortitsinermi ilaapput nuussualiarlu ilaatigut Nuummi Atlantic Musicip immiussisarfiani immiunneqarpoq, tassani Simon Uldum nuussualiortitsisuuvoq nipigissaasuullunilu, taamaattorli Peand-eL nammineq ataatsimut oqaatigalugu nuussualiami atorneqartut tamaasa suliarineqarnerat isumagalugu. ”Tarrara” saqqummersinneqaqqaartut pisarnerattut tunisaanermigut iluatsippallaanngilaq aamma nuussualiami pingajuata “Taalliniq” saqqummersinneranut atatillugu Peand-eL Simon Uldumip nuusiortitsivianut aallarteqqammersumut Frozen Mediamut nuuppoq. “Taalliniq” digitalinngorlugu januar 2012-mi saqqummerpoq, kisianni nuussualiaq taanna saqqummernissaminut anngutinngitsoorpoq Frozen Media nuusiortitsivittut keermiaasit atorunnaarsinneqarmat.

Peand-eL nipilersortartuuvoq najoqqutaqartussatut eqqarsaqqajaasorujussuaq. Assersuutigalugu nuussiami ilai nammineq oqaluttuassartaminut tunngatinniartarpai agguarlugit pereersimasunut – ullumikkumut – siunissamut. Eqqumiitsuliortutut/nipilersortartutut taaguutaa Peand-eL aamma najoqqutaqarpoq,tassalu Peter Lyberth aamma Peand-eL akornanni imminut immikkoortippoq. Taaguutip atorneqarnera pillugu nammineq ima nassuiarpaa: ”… Peand-eL, allat ajortortaat tamaasa nalunngisani oqaatigisinnaavai aamma nammineq ileqquliussanut akerliusinnaasarluni.”

Peand-eL’ip sunniisigai nunani tamalaani tusaamasat soorlu Eminem aamma Dr. Dre, kisianni aamma kalaallit tusaamasat sunniisigai soorlu Mariina aamma Rasmus Lyberth, taakkulumi aamma ”Tarrara”-mi suleqatigisimallugit.

Nalunaarsuut:

Allaaserisaq una tunngaveqarpoq Peand-eL-ip,ulloq 15.03.09-mi apersorneqarneranik.

Kalaallisuunngortitsisuuvoq Erno Aronsen.