Kalaallit Nunaanni nipilersukkanik kalaalinngorsaaneq 70-ikkunni Sumekkunnit aallartisarneqarluartoq ulloq manna tikillugu Kalaallit Nunaanni tusarnaarumaneqartaqaaq. Nipilersortartut amerlanersaat kalaallisut erinarsortarput Kalaallit Nunaannut tunngasut atornerusarlugt, ilaannikkullu qilaat inngernerlu akuliunneqartarput, nipilersortut sumiuunerat ersersinniarlugulusooq. Tassa nipilersortartut amerlanersaasa pissutsit Kalaallit Nunaannut tunngasut tusarnaartartullu kalaallit siunnerfiginerusarpaat. Kalaallit assammik kisinneqarsinnaasut ukiuni kingullerni qulini nipilersuutinik nunarsuarmioqatigiinnermut tunnganerusunik atuisalerput, nipilersukkaminnilu Kalaallit Nunaannut tunngasut imatorsuaq ersersinniartarunarnagit. Kalaallit Nunaanni najugalinni Angu Motzfeldt nipilersukkamigut nunarsuarmioqatigiinnermik ersersitsiniartartutut taakku siulliit ilagaat,, aammalumi 2004-mi nuusiaqqaamini danskit tusarnaartartumisut killissinnaasimavai.
Angup ilaatigut isumassarsiffigaa Amerikamiu nipilersortartoq erinarsuusiortarlu Jeff Buckley, Angullu rockimik saamanerusumik nipilersortarneq tassunga assingusoq ilisarnaatigineruaa. Nuusiaa Danmarkimi saqqummermat danskit tusagassiorfiisa Angup kalaallinik tunuliaqutaqarnera eqqaaqqajaasorujussuuaat, tamannalu Angup miserratiginngilaa, imatorsuarli ersersinniarsarinagu. Imaaqqajaannguatsiarpoq Danmarkimi nipilersorneq pillugu tusagassiortut Issittoq aamma Kalaallit Nunaat Angup nipilersugaasigut ersersikkusuttaraluaraat, tamannalu ersersinneqanngikkaangat ugguartoqalaartarunarluni. Angu taamaattuunngilaq, nipilersukkamigullu imminut ersersinniartuartarpoq inuttut nunarsuarmioqataasutut nutaaliaasutut, nunarsuarlu tamaat nipilersukkamigut angorussuttarlugu. Taamaannera erseqqilluarpoq nipilersukkatut isiginnaagassiami atugaani ”Time for time”-mimi. Videomi tassani aallaqqaasiullugu uatsinnut ersersinniarneqarpoq nunarsuup assinga silaannarsuarmit isigalugu, kingunitsianngualu Angu immiussisarfimmiittoq, kingusinnerusukkullu avatangiiseralugit nuissat, imeq innerlu ikualasoq. Taakkuali sumiiffimmik aalajangersimasumik takutitsisuunngillat, pinngortitalli pii takutinneqarput kikkulluunniit tamarmik attuumassuteqarfigisamittut ilisarisinnaassaat. Nipilersukkatut isiginnaagassiap tunuliaqutaa assigalugu nipilersukkat taallallu tuluttuut kalaalerpalaassusermik ersersitsinngillat, kisiannili nunarsuaq tamakkerlugu nalinginnaasumik nipilersuutaasartut asanninneq piumatussuserlu ersersinneqarlutik.
Nipilersukkatut takusassiaq Angup atugaa ”Time for time”tusarnaaruk:
Angu Danmarkimi nuusiamik saqqummersitsimmalli ullumikkumut kalaallit nipilersortartut arlallit tuluttuunerusoq erinarsorlutik saqqummertalersimapput, Kalaallillu Nunaata avataani tusarnaarumaneqartaqalutik. Taakkua arlaliusut tassaapput assersuutigalugu Nive Nielsen and The Deer Children, Simon Lynge aamma Small Time Giants, kalaalliussusertik sakkugalugu saqqummersartut, nunani allamiunik pisiortortoqalernissartik tunaartaralugu. Soorluluunniimmi nunani allamiut piumanerugaat nipilersortartut suminngaaneernertik ersersittassagaat, taamaaliornermikkullu piviusuunertik, tassa tusarnaartunut eqqortuliornertik, takutittassagaat. Najukkameersuuneq ersersinneqartassasoq nunarsuarmioqatigiit piumavaat, tamannalu periarfissatsialaavoq kalaallit nipilersortartut nunani allani ilisimaneqalernissaannut, kalaalliussuserminnik malunnarsisitsillutik, taamaalillutillu nunani allani nipilersortartunit allaanerussuteqarnertik ersersittassallugu.
Ukiuni kingullerni Nuummi inuusuttut arlallit nipilersukkaminnik saqqummersitsigaangamik nunarsuarmioqatigiiussuseq assorsuaq ersinniartarpaat. Taakkua ilarpassui nipilersornermik aaqqissuussisoqartillugu tusarnaartitsisarput nipilersoriaaseq underground, tusaamasanngornissaminnik soqutigisaqarpallaanngitsutnipilersuutigisartagaat, atortarlugu, tassuunakkut Kalaallit Nunaanni nipilersortartunut ilisimaneqartunut ilaannginnertik ersinniartarlugu. Nipilersortitsisarnerni taamaattuni taakku ilaat Kalaallit Nunaanni nalinginnaasuunngitsutut isigineqartariaqarput, assersuutigalugu metalimik nipilersortartut My Itchy Little Finger aamma dubsteppimik nipilersortartoq Uy-arakq, tuluttut erinarsorajuttuusoq. Aamma taamatut aaqqissuisoqartillugu ilaasartut tassaagajuttarput kalaalerpaluppallaanngikkaluamik nipilersorsinnaasut aamma inissaqartinnissaannik kissaateqartartut, ersersinniarlugulusooq Kalaallit Nunaanni aamma nipilersorsinnaasunik peqarmat sunilluunniit nipilersorsinnaasunik, tamannalu Kalaallit Nunaannut nunanullu allanut takutinneqarusuttarpoq.
Taamaalillutik erseqqissarniartarpaat Kalaallit Nunaat tassaasoq nuna allatulli nutaaliaasoq, kulturikkut neqerooruterpassualik. Imaappoq Nuummi nipilersortartut arlalippassuit tusaamasanngornissaminnik eqqarsanngitsut Kalaallit Nunaat nunatut naalagaaffittut ersersinniartarpaat, naak tamanna nipilersornermikkut qaqutiguinnaq tusarliuttaraluarlugu.
Metalimik nipilersortartut My Itchy Little Fingerikkut nipilersukkatut isiginnaagassiaminni atugaat “I” isiginnaaruk:
