Kalaallit nipilersortaasiat nunarsuarmioqatigiikkiartornerlu


Nipilersukkani suminngaaneersuuneq ersersinniarlugu ukiut qulikkuutaat arlallit ingerlaneranni Kalaallit Nunaanni nipilersortartorpassuit sulissutigisarsimavaat, nipilersukkalli tunuliaqutaata oqaluttuassartaa ilisimanngikkaani tamatuma qanoq suliarinissaa nalornissutaasinnaavoq. Nunarsuarmioqatigiileriartornerup piliaanik nunarsuarmi sumiffinni arlalippassuarni nipilersoriaatsit assigiit siumorsinnaavavut, tusarnaaqqissaaraannili nipilersukkat suminngaaneernerat tamatigorluinnangajak tusaaneqarsinnaasarpoq. Tamatumunnga soorunami pissutaavoq inuit namminneq nipilersukkanik pilersitsisarmata, naallu inuit ilarpassuisa internet atortaraluaraat filmillu Hollywoodimeersut isiginnaartaraluaraat nunarsuarmilu radioqarfinnit assigiinngitsunit nipilersukkat nutaanerpaat tusarnaartaraluaraat, taamaattoq inuit suli taakkuujuarput sumiiffinni aalajangersimasuni inuusut, oqaatsinik assigiinngitsunik atuisuusut, taamaalillutillu pissusilersuutit ileqqullugu aalajangersimasut ilaat kinaassutsiminnut attuumatinniartarlugit.

Sumiiffinnut inunnullu allanut attaveqaativut nunarsuarmi sumi inissisimanitta nassaariniarnissaanut, ilaatigut ajornakusoorsinnaasumut, ikiorsinnaavaatigut. Taamattumik aamma inissisimaffipput ulorianartorsiortinneqalersoq, silarsuarpullu tamaat nakkutigisinnaajumallugu tamanik takunnissinnaanitta, aamma killiliussatta, annaasinaaneri malugigutsigu, tamanna annilaajallannarsinnaavoq. Kisianni uatsinnut paasissallugu pingaaruteqarluinnarpoq silarsuarput ilisimagisatsinnit pisariunerujussuummat, aamma sumiiffiit inuillu akornanni killissat taamaallaat qaratsatsinni piusarmata. Nunarsuarmioqatigiinngorsaaneq uatsinnut, angajoqqaatsinnut taakkulu siuaasaannut pulaarsimavoq, tamannalu aatsaat miserratigigutsigu isumaqarlutalu kalaallisuinnaq, danskisuinnaq tuluttuinnarluunniit piusoqartoq, taava immitsinnut salloqittarsimassaagut. Aammami ‘kalaalliusorujussuarmik’ peqarsinnaavoq nipilersortartuugaani rock, grunge aamma dubstep, taamatullu qilaatersorneq kaluttuullu ilisimallugit. Tassa nipilersortartoq mattaap qanoq mamassuseqarneranik arsarnerillu qanoq isikkoqarneranik ilisimannittoq. Nipilersortartoq taama ittoq misilittakkaminik tamakkuninnga nipilersukkamigut ersersitsigaluarpalluunniit ersersitsinngikkaluarpalluunniit taava sumiiffiit, inuit taakkulu nipilersuutaat tamarmik misilittakkanik sunnerneqarnernillu akuugaasimassagaluarput, tassalu akuugaassutsip taassuma inuit sumiiffiillu tamaasa immikkuullarissunngortittarpai.

Kalaallit Nunaanni nipilersortartut ilaata tamanna nammineq ajunngilluinnartumik imatut oqaasertalerpaa:

Maani alliartorsimanngitsuuguma namminerlu oqaatsikka pigisimanngitsuugukkit, Nørrebromilu allamiluunniit alliartortuusimasuuguma, taava immaqa erinarsuutit allatut nipeqassagaluarput. Tassa allarluinnaasimassagaluarput.

Angu Motzfeldt, Nuuk (2009)

Qutsavigaakka nipilersortartorpassuit nipilersornermillu soqutigisalippassuit matuma allaaserineranut paasissutissiisimasut. Aamma qutsavigaakka Iben Andersen, Birgit Kleist Pedersen, Bjarne Kristoffersen, Kirsten Thisted aamma Mads Hendrich allaaserisap aaqqissuunneranut isummaminnillu immersuisimanerannut.