Angunnguaq Motzfeldt (Angu) nipilersortartuuvoq erinarsuusiortartuulluni kalaaleq tuluttut taalliortartoq. Cd-liai Kalaallit Nunaanni Danmarkimilu tunisaangaatsiartarsimapput.
Angu Qaqortumi 1976-imi inunngorpoq. Illoqarfimmi sukisaarsartarfimmi nipilersortalerpoq illoqarfiullu gymnasiaani atuartilluni nipilersornermik soqutigisaqarnini ingerlatiinnaarlugu. Gymnasiareerami Angu Nuummut nuuppoq niuernermik ilinniarfimmi atualissagami. Tassani illoqarfimmi nipilersortartut ilaat Century Schoolbook nipilersoqatigisalerpai. Siusinnerusukkut taamaallaat guitartarsimavoq nipilersuusiortaleriarmallu arlallit kajumissaartalersimavaat erinarsuusiami nammineq erinarsortaleqqullugit. Mik S. Christensen, aaqqissuisoq Atlantic Musicimilu immiussisartoq ikiortigalugu Angup 2003-mi nipilersukkat pingasut immiuppai. Taakku demo-nngorlugit Danmarkimi immiussisarfimmut nassiunneqartussaapput, kisianni demo taanna suli nassiunneqarianngitsoq Atlantic Musicip pisortaata Ejvind Elsnerip tusarnaaramiuk Angu isumaqatigiissusioqatigaa. Isumaqatigiissut tunngavigalugu tuluttut oqaasertalimmik nuussualiorngaarpoq ”Angu”-mik atserneqartumik, taannalu Københavnimi taamanikkut Sweet Silence Studios-imi immiunneqarpoq Troels Alsted aaqqissuisoqaralugu. Cd taanna Kalaallit Nunaanni Atlantic Musicimit aamma Danmarkimi Copenhagen Recordsimit saqqummiunneqarpoq. Nuussuaq Kalaallit Nunaanni 5000 sinnerlugit tunineqarpoq taakkulu amerlaqatingajaannik Danmarkimi tunineqarluni.
Danmarkimi saqqummiussinermi kingorna Angu Københavnimut nuuppoq nipilersortartutut anguniakkani malersorsinnaajumallugit ilaatigullu Årets Nye Danske Navnimi immikkoortumut Danish Music Awardsimut piukkunneqartutut nalunaarutigineqarpoq tamatumalu saniatigut nuuteeraq “Red Lights” MTV North Chart –imi normu 1-iulerluni.
Angup nuussualiaasa aappaat ”Burning Blue Skies” 2007-imi Kalaallit Nunaanni saqqummerpoq. Nussualiaq Atlantic Musicip Hvidovremi immiussisarfiani Mik S. Christensen aaqqissuisoralugu immiunneqarpoq. Nuussualiaq Danmarkimi saqqummersinneqarsinnaassappat danskit immiussisarfiat nutaaq alla nuussualiornissamik isumaqatigiissusiorfigeqqaarneqartariaqarpoq, taamaattumik “Burning Blue Skies” aatsaat maj 2009-imi danskit nipilersuutaarniarfiini nioqqutaalerpoq. Taanna Atlantic Musicip aamma Mermaid Recordsip akornanni suleqatigiinnikkut saqqummersinneqarpoq. Nuussualiap Danmarkimi saqqummiunneqarnerata nalerpiaani Angu Nuummut nooqqqippoq taamaakkaluartorli 2009-mi ukiakkut 2010-milu danskit tusarnaartitsisarfiini tusarnaartitsisussatut nittarsaanneqartarpoq.
Angu aammattaaq Nive Nielsenimik erinarsoqateqarpoq atorlugu ”Good for you” ”Nive Sings”-imeersumi (2009), aamma assilisaminik saqqummersitsisartutut Kalaallit Nunaanni ilisimaneqalerpoq.
Nalunaarsuut:
Aallaaserisaq una tunngaveqarpoq Angu ulloq 03.05.09-imi apersorneqarneranik.
Kalaallisuunngortitsisuuvoq Erno Aronsen