Foto: Anders MølleNanook aallartinneqarpoq Christian aamma Frederik Elsnerimit nipilersoqatigiinni marluullutik guitarertuuffigisaannik erinarsortuuffigisaannillu. Qatanngugiit angajoqqaaraat Ejvind aamma Marianne Elsner taakkulu mrluullutik nuussiortitsiviup Atlantic Musicip ingerlanneqarneranut peqataapput.
Nanook siulleersumik atugaraat ”Inuup Tarraa”, taannalu atorneqarpoq Christian Elsnerip naatsumik filmiliaani atukkatulli ateqaateqartumik. Filmimi pisut silaannarsuarmi piviusorpalunngitsumik tunuliaqutaqartumik pisuusaartinneqarput, nipilersornera ilutigalugu, Kalaallit Nunaanni inuuniarnikkut ajornartorsiutinut oqaaseqaateqarfiulluni.
2008-p ingerlanerani Martin Zinck aamma Ib Uldum Nanook-mut ilanngupput, nipilersoqatigiit Atlantic Music Festivalimi nipilersoqataaneranni tassanilu Daani Lynge aamma sivikitsumik keyboardertuulluni peqataavoq. Nipilersoqatigiinneq taanna imatorsuaq najukkami maluginiarneqanngilaq nipilersortartummi suli nuussualiamik immiussisimanngimmata. Tamannali allanngortinneqarpoq Nanook Atlantic Musics Hvidovremi immiussisarfiani assakkut 2009-mi immiussimmata nipilersoqatigiit nuussualiaat siulleq immiullugu. Imissiussinerni taakkunani Mads Røn keyboardertartoq nipilersoqatigiinnut ilannguppoq.
Nanook nuussualiaat siulleq ”Seqinitta Qinngorpaatit” november 2009-mi saqqummerpoq. Nipilersoqatigiit erinarsugaat kalaallisut taallartaqarput, Mik S. Christensenilli, nussualiamik taassuminnga nuussualiortitsisutut nipilersukkat oqaatigai tassaasut nipilersukkat “kalaallisut aamma nunat tamalaat nipilersortagaattut ataatsikkut” isigisariaasut. Kalaallit Nunaanni tusagassiuutit arlallit oqaatigaat Nanook tassaasut Kalaallit Nunaanni rockimik nipilersortarnermi nipilersortartuusut nutaaliortut, tamannali aporfiginagu nipilersoqatigiit najukkami tusarnaarteqarlualerput. Aasianni Nipiaa Rock Festival 2010-mi Christian aamma Frederik Elsner KODA-mit ”Ukiumut Nersornaasiuttakkamik” nersornaatisipput, tamatumunngalu pissutaatinneqarpoq nipilersoqatigiinni Nanookimi erinarsuusiortartut tassaanerarneqarmata: ”… inunnik tiguaallaqqissut nipilersuutitaat ilaaqqunnartut Indie-Rockit kalaallisut taallartaqarlutik pinngortitamut takorluuilersitsisarmata.”
December 2010-mi Nanook kuultinnapput ”Seqinitta Qinngorpaatit” 5000-nngorlugu tunisaasimammat.
2011-mi Nanook atukkanik 2 –nik atugaqarlutik soundtrackimik ilaapput filmimi ersinartulikkersaarummi kalaallit filmiliaanni “Qaqqat Alanngui”-ni. Atugaat “Ingerlaliinnaleqaagut”, soundtrackimut immikkut sanaaq Kalaallit Nunaanni radiokkut atorneqallattaartualerpoq.
Oktober 2011-mi nipilersoqatigiit suliaasa aappaat “Ai Ai” saqqummerpoq ukiup affaata ingerlanerani sølvinnassutaalluni tunisaasoq. Nuussiaq taanna saqqummeqqaaginnartorlu Ib Uldumip Martin Zinckillu nipilersoqatigiit qimappaat aaqqiagiinngingaatsiarmermik kinguneqartumik. Qatanngutigiit Christian aamma Frederik Elsner nipilersoqatigiinni ingerlaqqipput Mads Røn peqatigalugu. Andreas Otte bassertutut ilannguppoq piffissamilu sivisunerusumi ilaalerpoq tumerparpaartartoq Hans Rosenberg, Kalaallit Nunaanni nipilersoqatigiinni immiussanilu arlalinni peqataasarsimasutut ilisimaneqartoq, taannali 2014-mi upernaakkut Kim Heilmannimit taarserneqarpoq.
November 2012-imi Nanook nuuteeqqatut saqqummersippaat “Nilliasa” NGO’p ilaatut Nanu Børnip persuttaasannginnissamik paasisitsiniaaneranut taamatut atilimmut ilaasoq.
Juni 2013-imi Nanook saqqummersippaat nuussualiaq namminneq atsigartik Danmarkimi immiussisarfik Mermaid Records aqqutigalugu. Nuussualiap imarai immiuteqqitat ilaatigut nipilersoqatigiit siornatigut saqqummiussimasaannit pisut. Ukioq taanna decemberimi Atlantic Musicip saqqummiuppai tusarnaartitsinermit immiussaq DVD-nngorlugu aamma Blu Ray-imik immiussaq ukiup aallartinnerani siusinnerusumi Katuami immiussaq.
Nanook allaaserisap uumap allannerata nalaani Kalaallit Nunaanni, Danmarkimi, Islandimi, Norgemi, Finlandimi, USA-mi Savalimmiunilu tusarnaartitsisarsimapput. Nipilersoqatigiit saqqummersittagaat katillugit assilisat 12.000 sinnerlugit tunisimavaat.
Nalunaarsuut:
Kalaallisuunngortitsisuuvoq Erno Aronsen