Saamimmit: Tinka Abelsen, Hans Peter Kleemann, Ujuunnguaq Ilinngivakkeeq, Maasi Lynge.
Piitsukkut rockimik nipilersortartartuupput 70’kkut naalerneranneersut Kalaallit Nunaanni nuannarisaallualersut nuussuarmik LP’mik 1980-imi ”Inuiaat Naqisimaneqartugut Kattutta”-mik saqqummersitsinermikkut. Nipilersoriaaseq eqqarsaatigalugu Piitsukkut rockimik sakkortuumik nipilersortarput nunasiaateqarnermut akerliusumik taallartaqartartunik taamanikkut Sumikkut Innerulallu nalaanni pisartut assigalugit. Nipilersoqatigiit sallersaraat bassertartoq, erinarsortartoq erinarsuusiortartorlu Maasi Lynge Aasianneersoq, iggiingasumik ilungersorpaluttumik nipeqarnermigut pissutaagunartoq Piitsukkut Kalaallit Nunaanni punkimik nipilersortartut siullerpaartaattut kingorna ilisimaneqalernerannut.
Maasi Lynge 60’kkunni Aasianni nipilersornermik ingerlatsisut ilagaat nipilersoqatigiinni The Crying Thingsimi (TCT) nipilersortartuunermigut. Illoqarfiup realskoleani festernerit ilaanni guitarertartoq Upernavimmeersoq realskolemi ilinniartoq Hans Peter Kleemann naapippaa taamanikkut atuarfimmi nipilersortartut amerlaqisut ilaanni nipilersortartuusoq. Hans Peter Kleemann taamanikkut Qaqortumut nuuttussangorsimavoq radiotelegrafistitut ilinnialertussaanini pissutigalugu taamanikkullu Maasi Lyngep Hans Peter nipilersoqatissaqqissutut isigigamiuk Qaqortumut nooqqataavoq tassanilu Piitsukkut 1979-imi pilersinneqarput nipilersortartut allat marluk ilaliullugit, tassalu Tinka Abelsen tumerparpaartartoq aamma Ujuunnguaq Ilinngivakkeeq guitarertartoq.
Nipilersoqatigiit ukiuminni siullermi Qaqortumi imerniartarfimmi Skipperkromi nipilersortalerput ilaannillu Katersortarfimmi qititsitsisarlutik. Aammattaaq nipilersoqatigiit illoqarfimmut qanittumiittumut Narsamut nipilersoriallatsiartarsimapput.
1979-imi Qullissani Aasivimmi Maasi Lynge aasiviup immiussisarfiugallagaanut aqqusaatsiarpoq nipilersukkamilu ”Nammineq Pitsinnik” immiullugu nuussualiamut ”Qangattarsa Qangattarsartigut –mut ilaasussaq. Hjalmar Dahl aamma Karsten Sommer kalaallit nuussiortitsiaviannit ULO-meersut immiussisuupput kingornalu Piitsukkut tamakkerlugit qaaqquvaat Københavnimi Sweet Silence Studiomut LP-mik immiussitikkiartorlugit. April 1980-imi nipilersoqatigiit Københavniliarput nuussualiorput 9-nik atugartalimmik Hjalmar Dahl aamma Karsten Sommer aaqqissuisoqaralugit. Immiussinerit naammassimmata studiami festertoqarpoq ilaatigut Tuukkaq Teatremeersut peqataasoralugit tassanilu ”Aasiviup Kalattuna” immiunneqarpoq soorluttaaq taanna Aasivik 1980-imut nuuteqqatut tapertaasutut immiunneqarluni. Nuuteeraliaq naammassineqarmat aammattaaq taanna Piitsukkut LP-liaata saqqaata illuatungaanut ilanngunneqarpoq.
Sweet Silence Studiomi immiussinerit naammassineqareermata Piitsukkut Danmarkimi pingasoriarlutik tusarnaartitsipput, ilaatigut 1. majimi Forumimi Københavnimiittumi. Taamanikkut Pitsukkut inuttaatik inuttaralugit tusarnaartitsisarnitik naggaserpaat. Nipilersoqatigiinni ilaasortat Kalaallit Nunaannut uteramik illoqarfinnut assigiinngitsunut siammartiterput.
Piitsukkut immiussaat LP ”Inuiaat Naqisimaneqartugut Kattutta” aallaqqaataani imatorsuaq nuannarineqalertungikkaluarpoq. Upperisarsiornermik sammisallit “Palasi” KNR-kkut atoqqusaajunnaarsikkaluarpaat erinarsuutikkut Kalaallit Nunaata apostiliata Hans Egedep upperisarsiornerlu atorlugu inuiannik naqisimanninnerata pineqarnera assuaralugu. Erinarsuut assuarineqartoq aammattaaq LP’p saqqaani assiliartaliuunneqarsimavoq titartaasartup Tikkili Pjetturssonip Niaqornaneersup titartagaa tassani naqinneqarsimammat. Titartakkami ersersinneqarput nunap pissusia, affaani Kalaallit Nunaanni nunaqarfik alianaatsoq aappaanilu illoqarfissuaq suliffissuaqarfiusoq ipertooq alianassuseqanngitsoq illuisalu qaaviniit Hans Egede oqaluusisoq.
Erinarsugaq ”Seqineq” Kalaallit Nunaanni pinngortitamut nuannarinninnermut tunngasoq radiokkut atorneqartalersut siullersaraat Kalaallit Nunaannilu tamanit nuannarineqarlualersut ilagaat aamma atugaat nuannarisaasut ilagaat ”Nassuttuumut” aavariat Aasianneersut Nassuttuumeersut pineqarlutik. Ukiut arlalialuit qaanngiummata aammattaaq ”Palasi”-p tamanut ammaasumik atoqqusaajunnaarnera unitsinneqarpoq piffissallu ingerlanerani Piitsukkut Kalaallit Nunaanni rockimik nipilersortartut sallersaasut ilagilerpaat, naak nipilersoqatigiit taamanikkut nipilersortartunut allanut sanilliullugit allanik immiussaqarpallaanngikkaluartut.
Piitsukkut nuussualiaat 1992-imi nipigissaqqinneqarmat cd-nngorlugulu saqqummersinneqarmat nuuteeraq ”Aasiviup Kalattuna” atugaallu ”Nammineq Pitsinnik” ilanngunneqarput Maasi Lyngemik immiussat ataatsimut katersorlugit saqqummiussinnaaqqullugit. Maasi Lynge sivisuumik napparsimareerluni 1987-imi toquvoq.
Ukiut tuusintillit nikereermata nipilersoqatigiit sinneruttut assigiinnngitsunik inuttaqartarlutik assigiinngitsunillu soorlu Piitsukkut Jamimik aamma Piitsukkut (Mark 6)-imik ateqarlutik nipilersortarsimapput.
Nalunaarsuut:
Allaaserisaq una tunngaveqarpoq Hans Peter Kleemannimik ulloq 19.06.2012-imi apersuinermik.
Kalaallisuunngortitsisuuvoq Erno Aronsen.
Links:
http://www.kamikposten.com/KamikPosten_Piitsukkut_billedgalleri.htm