Ole Kristiansen 1965-imi inunngorpoq 1989-imilu nuussualiani siulleq ”Isimiit iikkamut”-mut saqqummersippaa nuusiortitsivik ULO aqqutigalugu. Musikvideo nuussualiami iluatsittumi atugaa “Zoo inuillu” MTV-mi takutinneqarpoq taannalu Australiap inoqqaavisa soqutigilluinnarpaat. Taamanimiilli Ole Kristiansen nuussualianik arlalinnik saqqummersitaqarpoq ilaatigut ”Qasapi-p ullua kingulleq” 2012-imeersoq. Nuussualiami toqqammavigineqarpoq qallunaatsiaat pillugit Villads Villadsenip qallunaatsiaat kingullermik kalaallinut sorsunnerat pillugu oqaluttuliatut taalliaa. Tassunga Ole Kristiansen nipilersugaliortuuvoq tusarnaartitsiutigalunilu isiginnaagassianut ateqaatigisaanut toqqammaviulluni.
Ole Kristiansenip taamatut nuussiaqqaava Atlantic Music malillugu 10.000 sinnerlugit tunisaavoq, kisiannili aamma “Pop uummataarufimmi” 1991-imeersoq aamma taamatut annertutigisumik nuannarineqarpoq tassanilu atukkat arlallit Olemut tuungatillugit tusarnaagallattaalerput. 1997-imi nuussualiaq ”Ullungullu illungullu inuuningullu tumerparpaartoralugit” qilaatersortumik ingiallortillit ullutsinnut, illutsinnut inuunitsinnullu takkupput taakkualu saniatigut 2004-mi ”Qaqqat asiilasuut” saqqummerpoq. 2007-imi saqqummersinneqarpoq “Kikiak”.
Ole Kristiansen taalliarpassui oqaasinngortillugillu nassuiaaterpassui Kalaallit Nunaanni nersualaarneqarput. Kalaallit Nunaanni nipilersukkat nuannarisaasut iluanni nikisitsisutut pingaarnertut Ole isigineqalerpoq, pingaartumik naalakkersuinikkut tunngasunik taallianiit, assersuutigalugu danskit kalaallillu akornanni pissutsit pillugit ilaatigut Sume, Piitsukkut aamma Inneruulat arlalippassuartigut saqqummiuttagaat assigalugit taallartaqartitsinermiit Kalaallit Nunaanni inuunermut tunngatillugu apeqqutit inunnut tunngalluinnartut pillugit atortagaanut siamasissusillit.
Maj 2009-imi KODA’p nersornaasiuttagaanik Ataqqinaammik Ole Kristiansen nersornaaserneqarpoq. Ole Kristiansenip toqqarneqarneranut pissutaavoq pingaartumik kalaallit nipilersortarnerisa iluanni ukiuni arlalinni takutitsilluartarsimammat.
Ole Kristiansen kalaallisut taallartaqartaraluarluni Kalaallit Nunaata avataani nussiaminik tusintillit arlalinnik tunisaqartarsimavoq.
Nalunaarsuut:
Birgit Kleist Pedersen Ilisimatusarfimmi Oqaatsit, Atuakkiat Tusagassiuutillu pillugit immikkoorrtortamersoq allaaserisamut matumunnga ilanngutassiisuuvoq.
Aallaaserisami aammattaaq issuaaffigineqarpoq Karen Ramsøep allaaserisaa Neriusaaq nr. 2, 2005, quup. 8-miittoq ”Ole Kristiansens lyrik”.
Kalaallisuunngortitsisuuvoq Erno Aronsen.