Nina Kreutzmann Jørgensen 1977-imi Nuummi inunngorpoq. Suli inuusoqaluni erinarsortartutut Kalaallit Nunaanni ilisimaneqalerpoq. Nina ilinniartitsisutut ilinniarsimavoq ukiunilu arlalinni Nuuk Internationale Friskolemi sulisimalluni. Uigaa Malik Olsen, produktionsingeniøritut Københavnimi Ingeniørhøjskolimi ilinniarsimasuusoq tamatumalu saniatigut guitarertartutut erinarsortartutullu Kalaallit Nunaanni tusaamasaasoq. Nina Malillu naapipput Nina Nuummi GU-mi atuarallarmalli tassanissaaq erinarsortartoq Julie Berthelsen ilisarisimalerpaat. Ninap meeraagallaramili atuaqataa ikinngutaalu Nuka V. Petersen (Peter O. Petersenip The Eskimosinnersup ernera) peqatigalugu sisamaallutik erinarsoqatigiinnik pilersitsipput Malik guitarimik ingiusisoralugu. Nipilersoqatigiit iluamik atserneqanngisaannarsimapput, kisiannili assigiinngitsunik pisoqartillugu tuluttut kalaallisullu erinarsuutinik nuannarisaasunik tulleeriillutik erinarsortarsimapput. 1998-imi nipilersoqatigiit Ole Kristiansen Band peqatigalugit tusarnaartitsinertik immiuppaat. Immiussaq musicalimut assinguvoq isiginnaartitsisartut Silamiukkut aaqqissuussaat, erinarsuutitaallu Kalaallit Nunaanni nipilersortartunit assigiinngitsunit pitsiaapput. Saqqummersitaq taaguuserneqarpoq ”Sarsuasut” taannalu nuannarineqarluarpoq kingornalu Kalaallit Nunaanni nipilersoriartarlutik angalapput aammalumi Islandimi Danmarkimilu tusarnaartitsiartortarlutik.
Aammattaaq1995-imiit Ninap assigiinngitsunut tunngatillugu immiussisarpoq Julie peqatigillattaartarlugu. Assersuutigalugu peqataaffigaat meeqqanut cd-liaq ”Arnajaraq” 1997-imi aamma partii Siumut erinarsuutaat immiullugit. Kingorna aamma Nina partii Atassutip erinarsuutaanik immiussivoq. Aammattaaq Nina Julielu erinarsoqatigiittarput nipilersoqatigiit utoqqasaanerumaartut ilisimasaasut peqatigisarlugit, soorlu Qarsoq, Nuutit aamma G-60.
1997-imi nipilersoqatigiit Qulleq saqqummerput siullermeersumik nuussiartik ”Qulleq ilissinnut” Melos Recordsimi Nina erinarsortoralugu immiussaq saqqummiussaralugu. Nuussiami atugaanni tunngaviupput Peter Møller-Lyngep erinarsuusiai. Nipilersoqatigiit Qulleq Nina sallersaralugu Kalaallit Nunaanni nuannarisaallualerput Ninalu nipilersoqatigiit nuussiaani katillugu pingasuni peqataavoq nipilersoqatigiillu taakku Ninap tunuareerneratigut nikerartunik erinarsortartoqarsimapput.
2000-mi aasakkut Nina immikkut aggersarneqarpoq islandimiumit erinarsortartumit Björkimit, taassumalu kissaatigisimavaa nipilersoriartortarluni angalanermini ”Vespertine”-mik taaguusikkami kalaallimik erinarsoqataasoqassasoq. Nina erinarsorluni ingiallortinut ilanngutitaavoq tassanilu kisimiilluni naatsumik erinarsugaqarluni nunarsuaq tamakkerlugu 2001-imi angalanermi.
Aamma ukioq 2001-imi nuussualiaq ”Zedna” immiunneqarpoq. Cd katitigaavoq Kalaallit Nunaanni arnat erinarsortartut nuannarineqarnerpaat arlallit erinarsortoralugit, tassanilu ilaatigut Nina aamma Julie peqataapput.
2003-mi Nina kisimiilluni erinarsorluni immiussinissamut Atlantic Musicimik suleqateqalerpoq, kisiannili naartunerit pissutillu pillugit aaqqiageeqqatigiinnginnerit pissutaallutik immiussaq aatsaat 2008-mi majimi naammassineqarpoq Mik S. Christensenip Danmarkimi Atlantic Musicip immiussisarfiutaani immiussereernertigut suleqatigereerneratigullu. Cd imaqarpoq erinarsukkanik Kaali Olsenip, Siiva Fleischerip erinarsuusiortartullu allat ilisimasaasut erinarsuussiaannik, kisianni aamma Nina, Malik Julielu peqataapput kisimiilluni nuussualiami ”Eqqissineq”-mi.
April 2009-mi Ninap kuultinnassutigaa nuusualiani ”Eqqissineq”, taamanikkut Kalaallit Nunaanni 6.800-nik tunisaasimasoq.
Nalunaarsuut:
Kalaallisuunngortitsisuuvoq Erno Aronsen