Arnaq erinarsortartoq Nive Nielsen Nuummi inunngorpoq tassanilu alliartorsimalluni. Aatsaalli pimoorussilluni nipilersortartuni nipilersortalerpoq inersimasunngoreerluni festernermi Jan de Vroede naapikkamiuk. Jan de Vroede Belgiamit kingoqqisuuvoq Nipilersornerlu pillugu ilisimatuussutsip iluani ilinniagaliulluni. Belgiami kingusinnerusukkullu Tysklandimi ilisimatusareerluni Nuummut nuuppoq ilaatigullu Chilly Fridayikkunni keyboardertartutut nipilersoqataasarluni. Kingorna NAPA-mi sulilerpoq tamatumalu saniatigut nipilersuussiortuulluni kalaallit filmiliaanni siullermi ”Nuumioq”-mi 2009-meersumi.
Nive Nielsen ilinniakkamigut masteriuvoq Visuel Antropologimi toqqarsimallugulu ilinniarnissani Ottawami Canadamiiittumi kingusinnerusukkullu Londonimi. Naak imminnut ungasikkaluaqalutik aapparivaa Jan de Vroede, ilinniarnermi nalaani Nuummi najugalik. Ilaanni Ottawami Nivimut tikeraarnermini guitalelemik aappaluttoq qaquartumik tunivaa, taannalu piffissap ingerlanerani ilisarnaataalerpoq aappariit marluullutik nipilersortartuini Nive Nielsen & the Deer Childrenimi. The Deer Childrenimut ilaasortaapput nipilersortartorpassuit nunarsuarmi sumiiffinnit tamanit tamaneersut periarfissaqarfikkut nipilersoqatigiinni nipilersoqataasartut, taamaalillutillu Nive Nielsen aamma Jan de Vrode nipilersoqatigiinni ataatsimoortuni taakkunani qitiullutik inissisimapput.
2009-mi nipilersoqatigiit Nivi Nielsen & the Deer Children nuussualiaq ”Nive Sings!” saqqummersippaat, tuluttut aqqaneq marlunnik kalaallisullu pingasunik erinarsuutitallit. Erinarsuutit imarisarpaat suulluunniit tamaasa Jan de Vroedep kaffisoriaasianiit pujoralannik milluaassut atorlugu sullinernik toqutsinernut, erinarsuutillu imaasa taakkua ersersippaat taallanik quiasunniutinik arlalipparsuarnik erinarsuusiaat imaqartartut. Taamaattorli nuussualiamissaaq sammivaat oqimaakkujuttut ilaatigut asanninneq maqaasinerlu. Nuussualiaq saqqummersinneqarpoq nuusiortitsivimmit Tuttu Recordingsimit, aappariit namminneq pigisaannit taassuminnga nuussualiornissamut atatillugu nipilersukkallu Kalaallit Nunaanni tuniniarneqarput Atlantic Musicimit.
”Nive Sings!” Europami aamma Amerikami Kujallermi tamani tamaani immiussaavoq aamma cd-liaanni peqataapput nunani tamalaani tusaamasat marlussuit ilaatigut John Parish, nuussualiortitsisut ilaat.
”Nive Sings!” saqqummersinneqaannartorli Nive Nielsen & the Deer Children Europami Amerikamilu Kujallermi nipilersoriarlutik angalaartalerput. Nipilersoqatigiit taamanimiilli nunarsuarmi nipilersorfissani tusaamasaasuni arlalinni tusarnaartitsisarput taamaalillutillu nunani tamalaani annertungaatsiartumik maluginiarneqartalerlutik. Assersuutigalug atugaat ”Pirate Song” 2010-mi USA-mi erinarsuusiortartut unammisarfianni anginerpaami ”Independent Music Awards”-imi tusarnaarneqarnerpaatut nersornaasigaapput.
“Nive Sings!” kalaallit saqqummersittagaannut sanilliullugu pissutsitigut arlalippassuartigut immikkooruteqartiterpoq. Aammattaaq nuussualiami tassani qarlortaatit kontrabassilu annertuumik nipilersuutigineqarput tamannalu kalaallit nipilersortagaanni nuannarisaasuni nipilersuutigineqartuni qaqutigoortuuvoq. Naak nipilersoqatigiit Kalaallit Nunaanni nuannarisaalaalersimagaluartut tusarnaartorisartagaat amerlanerit nunat allamiuupput nipilersortarnerilu pingaarnerit nunani allani ingerlanneqartarlutik.
Nive Nielsen kalaallit erinarsortartut Roskilde Festivalimut nipilersoriaqqusaasimasut ilagaat, tassanilu nipilersorput 2011-mi, ukiorlu taanna tyskit nuusiortitsiviannut isumaqatigiissummik Nive Nielsen and the Deer Children atsiuagaqarput, taannalu aqqutissiuisuuvoq nuussualiap “Nive Sings!” –ip nunarsuup ilarujussuani saqqummersinnissaanut.
2012-mi Nive Nielsen Danmarkimi Kronprinseparrets Stjernedrysprisimik nersornaaserneqarpoq.
Nalunaarsuut:
Kalaallisuunngortitsisuuvoq Erno Aronsen