{"id":186,"date":"2011-11-07T14:14:43","date_gmt":"2011-11-07T14:14:43","guid":{"rendered":"https:\/\/greenlandicpopularmusic.com\/gl\/?page_id=186"},"modified":"2015-11-26T14:08:26","modified_gmt":"2015-11-26T14:08:26","slug":"julie","status":"publish","type":"page","link":"https:\/\/greenlandicpopularmusic.com\/gl\/julie\/","title":{"rendered":"Julie"},"content":{"rendered":"

\"\"<\/a>Julie Berthelsen kalaallit erinarsortartut ilagaat Kalaallit Nunaata avataani tusaamaneqalernissamut piginnaaneqarsimasut. TV2-p piginnaanillit qaagitsimik aliikkutassiaa aqqutigalugu Julie tusaamaneqarnerulerpoq soorunalumi tamanna siuarsaatitut isigineqarsinnaavoq tamatumunngali peqatigitillugu oqaatigineqassaaq unammisitsisarnerni taama ittuni peqataasartut qaqutigoortuummata nipilersortarnermi sivisunerusumik atasinnaassuseqartartut. Julie piginnaaneqarsimavoq 2002-miilli aningaasarsiutigalugu erinarsortartuunissaminut allaaserisallu uuma allanneqarnerata nalaani siusinnerusukkutulli annertutigisumik cd-nik tunisaqarsimanngikkaluarluni filmini tv-nilu isiginnaartitsisartutut saqqumilersimavoq aamma Danmarkimi Kalaallit Nunaannilu tv-mi aallakaatitassiortartutut.<\/p>\n

Julie 1979-imi \u00c5rhusimi inunngorpoq, kisiannili Nuummi alliartorsimalluni anaanani, qatanngutini angutissanilu Per Berthelsen ilagalugit. Per Berthelsen tusaamaneqarpoq kalaallit inuiaassutsikkut nipilersortartuini Sume<\/a>mi erinarsortartut aappaattut, partiip Demokraatit pilersitsisuatut aamma partiimi Siumumi politikeritut.<\/p>\n

Juliep erinarsortartutut nuannarisaajartulernera Nuummi ilinniarnertuunngorniarfimmi atuarallaramili ilusinikkiartulersimavoq. Tassaniilluni naapippaa arnaq erinarsortartoq Nina<\/a> Kreutzmann J\u00f8rgensen marluullutillu immiuppaat meeqqanut cd-liaq \u201dArnajarak\u201d. Taamaalilluni arnat erinarsortartut taakku marluk suleqatigiinnerat ikinngutigiinnerallu aallartippoq tamannalu kalaallit nipilersorlutik tusarnaartitsisarneranni annertuumik pingaaruteqarsimavoq.<\/p>\n

Ilinniarnertuunngorniarfimmiinnerup nalaani Nina Julielu nipilersoqatigiiliorput Ninap sunaaffa uissaa Malik Olsen aamma Juliep taamanikkut angutaataa Nuka V. Berthelsen peqatigalugit. Nipilersoqatigiit 1998-imi peqataapput isiginnaartitsisartoqatigiit Silamiukkut musicalianni \u201dSarsuasut\u201d-ni. Musicalip nipilersuutai kalaallit einarsuusiortuinit assigiinngitsunit suliaapput nipilersorneqarlutillu aaqqissuunneqarlutillu Ole Kristiansen<\/a> Bandimit. Kingorna tassani atukkat nuussualianngorlugit saqqummersinneqarput tusaamasaalluartumik atugaallu \u201dQamani\u201d Juliep cd-mi erinarsugaa Kalaallit Nunaanni nipilersukkat nuannernersaasut akornanni aalaakkaasumik tusarnaarneqartalerpoq. \u201dSarsuasut\u201d saqqummiunneqarnerata kingorna nipilersoqatigiit Kalaallit Nunaanni, Islandimi Danmarkimilu tusarnaartitsiartorlutik angalasarput nipilersoqatigiit Mechanics In Ini inuttaat ingiallortitut nipilersortaralugit.<\/p>\n

1999-imi Julie Nukalu Danmarkimut nuupput ilinniariartorlutik, ukiorli qaangiutiinnartoq Julie aamma Nina nuussualioqqipput Kalaallit Nunaanni arnat erinarsortartut tusaamasat allat peqatigalugit nuussualiartillu atserlugu \u201dZedna\u201d (\u201dSassuma Arnaa\u201d). Cd-mi erinarsukkat Isak M\u00f8llerimit allataapput immiussisarfillu Melos Records saqqummiussisuuvoq. \u201dZedna\u201d nuannarineqartupilussuanngorpoq 8000-illu sinnerlugit tunisaalluni tamannalu Kalaalli Nunaanni qaqutigoortuuvoq.<\/p>\n

2002-mi Julie TV2\u2032p piginnanilinnut unammisitsinerani Popstarsimut ajugaaniutivinnermut ilaaqqullugu aggersarneqarpoq ajugaaniutivinnermilu nr. 2-tut inissilluni. Jon N\u00f8rgaard nr. 1-itut inissippoq ajugaasullu aqqusaagassai tamaasa aqqusaarlugit, ukiulli arlalialuit qaanngiummata Julie tusaamasaasutsimut appakaakkiartulerpoq. Popstars kingorna nuussualiat \u201dHome\u201d 2003-mi aamma \u201dJulie\u201d 2004-mi saqqummersippai. Pingaartumik nuussualiaa siulleq \u201dHome\u201d tunisaalluavissorpoq nuussualiaatalu aappaa \u201dJulie\u201d pingasunik nersornaatisissutigaa ukuusunik \u201d\u00c5rets danske sangerinde\u201d, \u201c\u00c5rets nye danske navn\u201d aamma \u201c\u00c5rets danske pop udgivelse\u201d 2004-mil Danish Music Awardsimi. 2008-mi nuussualiaq \u201casasara\u201d Juliep saqqummersippaa. Taanna kalaallisut taaguuteqaraluartoq nuussualiaq amerlanertigut tuluttuunik atugartaqarpoq, kisianni Julie ataataalu Per Berthelsen marluullutik nuussualiap ateqaataa erinarsuusiaraat taannalu nuussualiami kingullersatut tunuarsimaarpaluttumik inissisimalluni saqqummiunneqarpoq. Popstars takutinneqarnerata kingorna cd-it tunisaasut ikiliartoqqajaagaluartut taamaattoq \u201dAsasara\u201d-p tunisaanera ingerlaannarpoq 2009-illu nalaani \u201dLige Nu\u201d saqummersinneqarpoq atugaat danskisuunerullutik.<\/p>\n

2010-mi upernaakkut Julie nipilersornermik tv-kkut unamminitsinissamut ilaajumalluni nalunaaqqippoq. Taamananikkut TV2\u2019p unammisitsinera Allstars siuliminut sanilliullugu eqqissisimakannerneruvoq, tassa erinarsoqatigiit sisamat illoqarfinnit sisamanit assigiinngitsunit pisut siunertamut ajunngitumut 250.000 kr. unammissutigisussaamatigik. Julie Nuuk aamma Kalaallit Nunaat sinnerlugit peqataajumalluni nalunaarpoq erinarsoqatigiit kalaallinik aamma inunnik Kalaallit Nunaannut attuumassuteqartunik inuttaqartissallugit. Kisimiillutik erinarsortartut marluk nammineq erinarsoqatigiimmini erinarsortorisussaavai. Peqataasussat ilisaritinneqannginneranni Juliep Nina aperisimavaa takkukkumassannginnersoq. Siullermik Nina naaggaarsimagaluarpoq, kisiannili Julie erinarsoqataasussanik Katuami tusarnaaleruttortoq aarimmi Nina takkutiinnaqaaq. Mads Lumholt, ukiuni arlalinni erinarsoqatigiinni Aavaakkunni aqutsisuusimasoq peqatigalugu Ninakkut siuttuulerput Juliep Allstarsini erniarsoqatigiivini.<\/p>\n

Allstars 2010-mi siullermeerlutik apriilip qaammataani tv-kkut takutitsipput aallakaatitamilu siullermiit takuneqarsinnaalereerpoq Juliep erinarsortartui unammisitsinermi siuarsimalereersimasut. Taamatut ilimatsanneq aallakaatittakkap ingerlanerani allanngunngilaq Juliellu erinarsoqatigiivi ajugaapput nipilersornerik scenemilu pisinnaasaminnik paatsuugassanngitsumik takutitsereernermikkut tassanimi kalaallit kulturiat atorneqarpoq, kisianni aamma kalaallit assigiinngissutaat marluk ataatsimut peqatigiissinnaanerat takutinniarneqarluni.<\/p>\n