Prussic


Chilly Fridayikkut tumerparpaartuata Alex Andersenip nammineq nuussiortitsivimmi Beat! Productionsip pilersereerneratigut Nuummi inuusuttut sukisaarsartarfianni Alleq-mi atorfinippoq videoliornermik ilinniartitsissalluni. Inuusuttut takkuttut ilaat rappimik nipilersorput taamaattumillu taakkua namminneq nipilersugaannik musikvideoliornissamik isumassarsivoq. Nipilersoqatigiit inuusuttut pingasut atugartik ataaseq Alex Andersenip Ding Dong Studioani immiuppaat taamaasillunilu tamanna ineriartorteqqinneqarpoq tassalu rappertartut Prussic (blåsyre) pilersinneqarput inuttaralugit Taatsi Højgaard, Maasi Pedersen aamma Kunuk Kleist.

Alex Andersen nipilersoqatigiit nuussualiaannik “Misiliineq Siulleq”-mik aaqqissuisuuvoq taannalu 2003-mi Beat! Productionsimit saqqummersinneqarpoq. Tallartaat kalaallisuujupput tassaallutillu kinguaariinnik utoqqasaanerusunik naveersinerit, taallatigummi taakkunatigut Prussicip utoqqasaanerusut inuiaqatigiinnik aqutseriaasiat meeqqanillu pinneriaasiat isornartorsiorpai. Taallat oqariartuutaat toqqaannartorujussuarmik tunniunneqarput nipilersoqatigiinnilu ilaasortat ilaasa nammineq misilittagaannik tunngaveqarput. Taamaalliluni nuussualiaq 00’kkunni pisartut assigalugit nipilersukkat aqqutigalugit inuuniarnermi ajornartorsiutit uparuartorpaat taamaalillutillu sammisat taama ittut Kalaallit Nunaanni nipangiutiinnarneqartarnerat avammut ammaassiffigalugu. ”Misiliineq Siulleq” 4000 sinnerlugit tunisaavoq, tamannalu Kalaallit Nunaanni rappimik nipilersortarnermi nalinginnaasuunngilluinnarpoq taamalillutillu Prussic nuussualiartik taanna 2004-mi Kodamit nersornaatisissutigaat.

Tamatuma kingorna Maasi Pedersenip kisimiilluni siullermeersumik nuussualiorpoq ”Maasi”-mik taaguusikkaminik, tassanilu pineqarnerupput nammineq meeraanermini misigisartagai aamma tamatuma saniatigut Kunuk Kleist peqatigalugu Ole Kristiansenip nuussualiaasa tallimaanni “Kikiak”-mi tusarnaartitseqataapput. Taatsi Højgaard kingorna aamma Taatsers-imik atserluni rappertartuuvoq.

Nalunaarsuut:

Kalaallisuunngortitsisuuvoq Erno Aronsen.