Kimmernaq Kjeldsen Aasianneersuuvoq peroriartorsimavorlu kalaallimik anaanaqarluni qallunaamillu ataataqarluni. Ataataa Århusimi nipilersornermik ilinniarfimmi konservatoriami ilinniartuusimavoq Kimmernap anaanaata naapinnissaata Kalaallillu Nunaannut nooqatiginissaata tungaanut. Taamaattumik Kimmernaq mikigallaramili nipilersornermut qanittuararsuusimavoq. Taamaattumillu ilimagisassaanngitsuunngilaq Kimmernaq Kalaallit Nunaanni erinarsortartut tunisaqarnerpaat ilagilertussaammassuk ukioq 2000-imi Aasianni GU naammassereerlugulu Nuummut nuunnermigut Air Greenlandimi saqisutut – stewardessetut – atorfinissimammat. Ukiuni pingasuni saqisutut sulereerluni Danmarkimut nuuppoq RUC-milu atualerluni qaammatillu marluinnaat qaangiuttullu ilinniarfini qimattariaqarsimavaa tamatumunngalu taarsiullugu guldsmeditut ilinnialerpoq saqisutut sulinini ingerlatileqqiitigalugu. Teknisk skolemi naammassereernermini ilinniaqatini allat peqatigalugit Sankt Hans Torvimi guldsmedeværksted ammarpaa.
Kimmernaq Københavnimi suli najugaqartillugu meeraagallaramili ikinngutaaa Pilup (Pilunnguaq) Lyngep aperisimavaa Pilup erinarsuusiaasa ilaannik Kimmernaq erinarsortuusinnaannginnersoq Atlantic Musicip Danmarkimi immiussisarfiutaani taamanikkut Københavns Nordvest kvarteriani inissisimasumi immiunneqartussami.
Kimmernap, Pilu Lyngep aamma Atlantic Music’p nuussiortitsisuata Mik S. Christensenip suleqatigiinerisa kingunerisaanik nuussualiaq ”Tunissut” pinngorpoq 2006-imi saqqummersinneqartoq. Nussualiaq taanna qulinik atugartaqarpoq kalaallisut taallartalinnik aamma najukkami pisartumik imalimmik. Qaammatit marluunngitsulluunniit nuussualiaq taanna sølvpladinnappoq allaaserisallu matuma allaaserinerata nalaani 7000 sinnerlugit tunisaasimalluni. Pilu Lynge ukioq taanna Kalaallit Nunaanni KODA’p Ukiumoortumik Nersornaasiuttagaanik nersornaaserneqarpoq manna tunuliaqutaralugu: ”… erinarsugaasa kulturikkut oqaasertai tusaajuminartut peqqutigalugit Kalaallit Nunaanni kulturikkut kingornuttakkat maanna nassaarineqaqqipput”.
Immiussap ”Tunissut”-ip saqqummersereerneratigut Kimmernaq Kalaallit Nunaanni Danmarkimilu tusarnaartitsiartoqattaarpoq piffissallu ilaani nipilersortartartutut inuuniuteqarluni tamannalu Kalaallit Nunaanni nalinginnaasuunngilaq. Siullermik Københavnimi aallaavilinni ingiuisuullutik nipilersortatuni ilaavoq tassanilu inuttaasut Kalaallit Nunannut attuumassuteqartarsimapput. Taakku tassaapput Hans Rosenberg tumerparpaartoq, Jens Simonsen bassertoq, Jes Berthelsen innaallagissamoortumik guitareertoq aamma Stefan Johansson innaallagissamoortuunngitsumik guitarertoq. Kingorna Kimmernap DiskoBay Blues ingiuisuut nipilersortartorilerpai.
2008-mi Kimmernaq Nuummut uteqqippoq Air Greenlandimilu saqisutut sulilerluni. Taamanimiilli Kalaallit Nunaanni Danmarkimilu aaqqissuussisarnerni assigiinngitsuni susoqarnissaanik saqqummiussisartutut ilisimaneqalerpoq. Ilaatigut erinarsortarpoq saqqummiussisuusarlunilu angutaatini Mike Fencker Thomsen Ice Cool Rockimi ilagisarlugu, aaqqissuussinerlu taanna Namminersorneq pillugu qinersinissamut atatillu angertussanut 2008-mi naalakkersuinikkut nipilersortitsinertut aaqqissuussaavoq. Kimmernap nuannerineqarnini aammattaaq atoqqippaa juni 2009-mi inatsisartunut qinersinermut atatillugu. Tasani erinarsorpaa qineqqusaarnermi IA-p erinarsuutaa ”Ataqatigiinneq”, Mike Fencker Thomsen aamma nipilersortartoq Hans Jukku Noahsen ilagalugit.
2013-imi Kimmernap nuussiaata aappaa “Uani” saqqummersinneqarpoq tamatumuunnattaaq Atlantic Music aqqutigalugu. Nuussiami tassani nipilersukkat taallallu Frederik Elsnerimit (Nanook il.il.) aaqqissuussaapput ataaserlu Christian Elsnerimit (Nanook allallu). Frederik Elsner aamma nuussiami tassani nuussiortitseqataavoq Mik S. Christensen peqatigalugu. Soorluttaaq nuussiami “Tunissut”-mi taallat “Uani”-sulli taallartartatut nunatsinnut asanninnermik, pinngortitamik, qanga pisimasunik siuaasanillu imaqarput. Kalaallit oqaluttuatoqaat tassanissaaq pingaaruteqarlutik inissisimapput assersuutigalugu atugaq qiiaamminartoq anersaaq ajortoq “Ikusimiaq” pillugu. Atukkami “Sunaana anguniarpiuk?”-mi, “allasiortarneq” taallami sammineqarpoq, taannalu kalaallit nipilersortagaanni sammineqarajuttuunngilaq.
December 2013-imi ”Uani” kultinnappoq Kalaallit Nunaanni nalilersueriaatsit nutaat malillugit, siornatigut tunisat 5.000-gaangata kultinnattoqartaraluartoq maanna 3.000 tunisaagaangata kultinnattoqartalerpoq.
Nalunaarsuut:
Allaaserisaq una Kimmernaq Kjeldsenip ulloq 20.02.2009-mi apersorneqarneranik tunuliaqutaqarpoq.
Kalaallisuunngortitsisuuvoq Erno Aronsen