Kalaallit Nunaanni nipilersorneq


Kalaallit Nunaanni nipilersukkat naalaarneqartartut nipilersortartullu atortagaat nunani allani naalaarneqartartunit atorneqartartunillu assut sunnigaapput. Taamaakkaluartoq nipilersortartut kalaallit amerlasuut nipilersoriaatsiminni kalaallit nunaamiorpalussuseq qangalili pilersikkiartorsimavaat, aamma rockimik popimilluunniit nipilersornerminni. Nipilersoriaatsit taakku avataaniit takkuttut aqqutigalugit misigissutsit sumiiffinni ataasiakkaani pilersinneqartartut ‘oqaatigineqartarput’. Sumiiffiit tamakku Kalaallit Nunaannut atasuunerisa erinarsuutitigut ersersinnerisigut taalliortut peqataasimapput Kalaallit Nunaat nunatut ataatsimut pigisamik kulturilittut misigissuseqarfigitilerlugu, tassaanngitsoq qeqertarujussuaq akuttusuunik inoqarfilik.

Uani takussavarput sumiiffiit qanoq ilillutik nipilersoriaatsinut Kalallit Nunaanni tusaaneqarsinnaasunut attuummalersimanersut, sumiiffiillu tamakku qanoq misigisaqarfigisinnaanerivut. Nipilersornerli paasilluassagutsigu nipilersornerup Kalaallit Nunaanni oqaluttuassartaa kingumut uterfigineqarnerpaaffissaanut uteqqaartariaqarpugut, nipilersuutip siulliup pinngorneranut.