Nipilersoqatigiit DDR qatanngutigiinnit angutinit Uldumikkunnit pilersinneqarput. Qatanngutigiit angajulliit marluk Simon aamma Anda (Andreas) guitarertartuupput taamaattumillu nukarlersartik Ib bassimik tunisimavaat piffissap ingerlanerani bassertuusalerniassammat. Nipilersoqatigiinni DDR-ikkunni qatanngutigiit tamarmik pingasuullutik minnerusumik annerusumilluunniit atukkaminni tamani erinarsortuusarput.
DDR-imi nipilersoqatigiit nuussiaat siullerpaaq ”Siulleq” Nuummi Atlantic Musicimi 2002-mi immiuppaat. Immiussinerup nalaani Martin Zinck tumerparpaartartutut ilannguppoq. Taassuma siusinnerusukkut Anda Uldum nipilersoqatigisarsimavaa Psyched Up Janis cover-bandimi Andabusimi, taakku marluullutik Aasianni GU-mi atuarallaramik. Andabus atorunnaarsinneqarpoq Andap GU qimammaguli Ilulissanullu nuunnermini isumaginninnermi perorsaasutut ilinnialernissani pissutigalugu. Inuit taakku marluk akunnerminni ukiut sisamat missaanni attaveqatigiissimanatik Anda 2002-mi Martinimut sianerpoq DDR-imi ilaarusunnginnersoq aperiniarlugu.
DDR nuussiaqqaartik immiummassuk Martin Nuummut nooqqammersimavoq taamanikkut Siimuup aamma najugarilersimasaani. Taamanikkut Anda Ilulissani suli najugaqarpoq Ib-ilu Aasianni najugaqarluni GU-milu atuartuulluni. Taamaakkaluartoq nipilersoqatigiit nuussiartik siulleq naammassereerlugulu DDR Kalaallit Nunaanni angalaarluavissortarput 2003-milu nipilersoqatigiit KODA’p nersornaasiinerani Ukiumut Nersornaasiuttakkamik nersornaaserneqarput.
2003-p ingerlanerani nipilersoqatigiinnut ilaasortat Nuummi katersuupput 2004-milu nipilersoqatigiit nussualiaasa aappaat ”Kaar!” immiunneqarpoq Mik S. Christensen DDR-kkut nuussualiaannik siullermik aamma immiussisuusimasoq immiussisoreqqillugu.
Ukioq taannarpiaq DDR Nuuk Festivalimi nipilersorput danskit nipilersoqatigiit Carpark North aamma nipilersoqataaffigisaanni. Nipilersortartut Carpark Northimeersut aqutsisortik nussiortitsisortillu Joshua (Jon Schumann) angalaqatigaat, taamaattumillu taanna periarfissarsisimavoq festivalernerup nalaani DDR-kkut nipilersortut tusarnaarnissaannut. Joshua Danmarkimut uteqqikkami suliaqaqatiminut Henrik Marstalimut kajumissaarutigaa DDR atoqqullugit Gasolinip atugaata ”Kap Farvel til Ümánarssuaq”-p immiunnissaanut nuussualiami ”Protestsange.dk”-mi ilaasussami. Tamatuma kingunerisaanik DDR Danmarkimut aggersarneqarput, atugarlu taanna tassani immiullugu 2006-milu “Protestsange.dk”-p saqqummersereernerani atugaq taanna oqallisaalluarpoq.
DDR-imi nipilersortartut nuussiaqqaammik saqqummersereerneragulli Nuummi nipilersortartut nuimanerit ilagilersimavaat, ilaatigut nipilersoqatigiit nipilersoqataallattaartarnerisigut nipilersoqatigiilluunnit allangorartunik inuttaqataraluartut. Anda Uldum maluginiarluarneqarpoq meeqqanut cd-liami atugaq ”Angakkuakkatut” erinarsoramiuk taannami Jan Hilmarsip meeqanut cd-liamini ”Fra Hulter til Bulter”-imi erinarsormagu aammattaaq Anda partiimi Demokraatini naalakkersuinermik sulialittut peqataalluarpoq ullumikkut siulittaasuuffigisaminik. Simon nutserisutut ilinniagaliuvoq, kisiannili ukiuni arlalinngortuni Nuummi Atlantic Musicip immiussisarfiani nipigissaasutut nuussiortitsisutullu atuussimalluni nuussiortitseqatigiiffiullu immiuttagaannut arlalinnut taallanik erinnianillu pilersueqataasarsimalluni. Ib aamma Martin Kalaallit Nunaanni nipilersortartuni nuannarineqarnerpaani arlalinni nipilersoqataasarsimapput marluullutillu nipilersoqatigiinni Nanook-kunni 2008-2011-mut nipilersoqataasarsimallutik.
Nipilersoqatigiit DDR taamatsivissunngisaanarsimapput, ukiunili kingullerni killilimmik peqataasarsimallutik nipilersoqatigiillu amerlanersaat ullumikkut Danmarkimi najugaqalersimammata.
Nalunaarsuut:
Kalaallisuunngortitsisuuvoq Erno Aronsen